काठमाण्डौं – दसैं बिदापछि खुलेको सेयर बजारमा खरिद चाप बढेसँगै नेप्से परिसूचक ५५ दशमलव ९८ अंकले बढेको छ । गत साता २ दशमलव १३ प्रतिशतले बढेको परिसूचक २ हजार ६९० दशमलव १५ अंकमा पुगेको हो ।
नेपाल स्टक एक्सचेन्ज (नेप्से)का अनुसार गत साता ३४ अर्ब ३९ करोड रुपैयाँको सेयर कारोबार भएको छ । अघिल्लो साता २२ अर्ब ५३ करोड रुपैयाँको कारोबार भएकामा यस साता कारोबार रकम ५२ दशमलव ६४ प्रतिशतले बढेको हो । पाँच कारोबार दिनको दैनिक औसत कारोबार रकम ६ अर्ब ८८ करोड रुपैयाँ पुगेको छ ।
बजार पुँजीकरण एक सातामा एक खर्ब रुपैयाँले बढेर ४६ खर्ब ३० अर्ब रुपैयाँ पुगेको छ । ‘क’ वर्गका कम्पनीको कारोबार मापन गर्ने सेन्सेटिभ इन्डेक्स पनि २ दशमलव ०३ प्रतिशतले बढेर ४८७ दशमलव ६६ अंकमा पुगेको छ ।
उपसमूहतर्फ जलविद्युत् परिसूचक सबैभन्दा बढी ३ दशमलव ७८ प्रतिशतले बढेको छ । अन्य उपसमूह ३ दशमलव २३, विकास बैंक २ दशमलव ६१ र वाणिज्य बैंक २ दशमलव ३२ प्रतिशतले बढेका छन् । निर्जीवन बिमा उपसमूहको वृद्धि सबैभन्दा कम शून्य दशमलव १८ प्रतिशत रहेको छ । लघुवित्त ० दशमलव ९७ र जीवन बिमा उपसमूह १ दशमलव ०६ प्रतिशतले बढेका छन् ।
दसैंपछिको पहिलो साप्ताहिक कारोबारमा बजार बढेपछि लगानीकर्ताको मनोबलमा सुधार आएको देखिए पनि अर्थतन्त्र र कम्पनीहरूको वित्तीय अवस्थामा उल्लेख्य सुधार नदेखिएको अवस्थामा यो वृद्धि कति टिकाउ हुन्छ भन्ने प्रश्न कायम छ ।
प्रतिक्रिया दिनुहोस्