काठमाण्डौं – युनिस विक्रम ठकुरी र हुसेन तलातको घातक बलिङपछि कर्णाली याक्सले नेपाल प्रिमियर लिग (एनपिएल) मा पहिलो संस्करणको विजेता जनकपुर बोल्ट्सलाई १९ रनले पराजित गरेको छ । त्रिवि क्रिकेट मैदानमा मंगलबार भएको खेलमा कर्णालीले प्रतियोगितामा महत्त्वपूर्ण जित निकालेको हो ।
कर्णालीले दिएको १३३ रनको लक्ष्य पछ्याएको जनकपुर १९.३ ओभरमा ११३ रनमै समेटियो । जनकपुरका ब्याटरले नियमित अन्तरालमा विकेट गुमाउँदा लक्ष्य भेट्टाउन सकेनन् । कर्णालीले सामान्य योगफल बनाए पनि कसिलो बलिङ गर्दै जित सुनिश्चित गरेको हो ।
कर्णालीका युनिस विक्रम ठकुरीले चार ओभरमा एक मेडनसहित २२ रन खर्चेर तीन विकेट लिए । हुसेन तलातले पनि २६ रन दिएर तीन विकेट हात पारे । युनिसले १५औँ ओभरमा लगातार दुई बलमा विकेट लिँदै मेडन ओभर फालेपछि खेल कर्णालीको पक्षमा मोडिएको थियो । नन्दन यादवले दुई तथा सोमपाल कामीले एक विकेट लिए ।
जनकपुरका लागि अभिषेक तिवारीले २०, मोइन अली र हरमित सिंहले समान १९ तथा जिमी निशमले १५ रन बनाए । मयन यादवले १४ रन जोडे । कर्णालीका बलरले मध्यक्रम र तल्लो क्रमका ब्याटरलाई लामो साझेदारी गर्न नदिँदा जनकपुर लक्ष्यभन्दा १९ रन पछाडि रह्यो ।
यसअघि टस हारेर पहिले ब्याटिङ गरेको कर्णालीले २० ओभरमा नौ विकेट गुमाएर १३२ रन बनाएको थियो । अरिफुल इस्लामले २९ बलमा चार छक्कासहित सर्वाधिक ४३ रन बनाए भने पवन सर्राफले ३७ रन जोडे । उनीहरूबीच चौथो विकेटका लागि ४२ रनको साझेदारी भएको थियो ।
जनकपुरका १६ वर्षीय राहुल यादवले डेब्यू खेलमै चार ओभरमा १५ रन दिएर दुई विकेट लिए । कप्तान हरमित सिंहले तीन तथा मोइन अलीले दुई विकेट हात पारे पनि टोलीलाई जिताउन सकेनन् । कर्णालीले ब्याटिङमा बनाएको १३२ रनलाई बलिङको प्रभावकारी प्रदर्शनमार्फत बचाउँदै खेल आफ्नो पक्षमा पारेको हो ।
प्रतिक्रिया दिनुहोस्