दैलेख – सापकोटा कल्याण केन्द्र दैलेख शाखाले शनिबार दैलेखमा सुर्खेत निर्वाचन क्षेत्र नं. २ बाट प्रतिनिधिसभा सदस्यमा निर्वाचित रमेश सापकोटाको स्वागत तथा सम्मान र बडादशैंको शुभकामना आदानप्रदान कार्यक्रम आयोजना गरेको छ । यही अवसरमा सापकोटा कल्याण केन्द्र दैलेखले दैलेख सदरमुकामकाे नमूनाबस्तीका अतिविपन्न ५ परिवारलाई दशैं खर्च सहयाेग स्वरुप २५-२५ केजी चामल र दाल-तेल बाँडेकाे छ ।
गत फागुन २१ गते सम्पन्न प्रतिनिधिसभा निर्वाचनबाट निर्वाचित सांसद रमेश सापकोटाले आफ्नो राजनीतिक तथा सामाजिक यात्रामा सापकोटा कल्याण केन्द्रले देखाएको सद्भाव र अपनत्वप्रति कृतज्ञता व्यक्त गर्नुभयो । स्वागत तथा सम्मानले आफूलाई थप जिम्मेवार बनाएको उल्लेख गर्दै उहाँले केन्द्रले सामाजिक एकता, आपसी सहयोग र समुदायबीचको सम्बन्ध सुदृढ गर्न पुर्याउँदै आएको योगदान महत्वपूर्ण रहेको बताउनुभयो ।
सांसद सापकोटाले कर्णाली प्रदेशका मुख्य समस्या, विकासका आवश्यकता र जनजीविकासँग जोडिएका सवाललाई संसद्मा उठाउँदै आएको बताउनुभयो । नागरिकले भोगिरहेका समस्या समाधान, विकासका अवसर विस्तार र जनताको जीवनस्तर सुधारका विषयलाई संसद्मा प्रभावकारी रूपमा प्रस्तुत गर्न आफू प्रतिबद्ध रहेको उहाँले उल्लेख गर्नुभयो । बडादशैंले आपसी सद्भाव र एकता बढाउँदै समाजलाई सकारात्मक दिशामा अघि बढ्न प्रेरणा दिने उहाँको भनाइ थियो ।
सापकोटा कल्याण केन्द्र कर्णाली प्रदेशका सभापति मोतिलाल सापकोटाले निर्वाचित जनप्रतिनिधिलाई स्वागत तथा सम्मान गर्नु केन्द्रका लागि गौरवको विषय भएको बताउनुभयो । समुदायबाट निर्वाचित प्रतिनिधिसँग सम्बन्ध र सहकार्य बलियो बनाउँदै कर्णालीका साझा समस्या समाधान तथा सामाजिक विकासमा योगदान पुर्याउनुपर्ने उहाँले बताउनुभयो । बडादशैंले परिवार तथा समाजमा सुख, शान्ति र आपसी सद्भाव कायम गर्न प्रेरणा दिने उहाँको शुभकामना थियो ।
केन्द्रको सुर्खेत शाखाका अध्यक्ष हरि सापकोटाले सांसदको स्वागत तथा सम्मानले सापकोटा समुदायबीचको सम्बन्ध र एकतालाई थप बलियो बनाउने बताउनुभयो । जनप्रतिनिधिले नागरिकका आवश्यकता र समस्यालाई प्राथमिकतामा राख्दै विकास निर्माण तथा जनजीविकाका सवालमा प्रभावकारी भूमिका निर्वाह गर्नुपर्ने उहाँले उल्लेख गर्नुभयो । बडादशैंको अवसरमा आपसी सहयोग, भाइचारा र सामाजिक सद्भाव अझ सुदृढ होस् भन्ने उहाँले शुभकामना व्यक्त गर्नुभयो ।
सापकोटा कल्याण केन्द्र दैलेख शाखाका अध्यक्ष टीकाराम सापकोटाले स्वागत तथा सम्मान कार्यक्रमले केन्द्र र जनप्रतिनिधिबीचको सम्बन्धलाई थप आत्मीय बनाएको बताउनुभयो । सामाजिक एकता, आपसी सहयोग र समुदायको हितमा साझा पहल गर्नु यस्ता कार्यक्रमको महत्वपूर्ण उद्देश्य रहेको उहाँले उल्लेख गर्नुभयो । बडादशैंले सबैमा सुख, शान्ति र समृद्धि ल्याउनुका साथै सामाजिक एकताको भावना बलियो बनाओस् भन्ने उहाँको शुभकामना थियो ।
केन्द्रका दैलेख शाखा सचिव पूर्णप्रसाद सापकोटाले स्वागत तथा सम्मान कार्यक्रमले समुदायका उपलब्धिलाई साझा रूपमा मनाउने र आगामी दिनमा सहकार्य बढाउने अवसर प्रदान गरेको बताउनुभयो । सामाजिक तथा सार्वजनिक जीवनमा योगदान गर्ने व्यक्तिलाई सम्मान गर्दा अरूलाई पनि समाजप्रति जिम्मेवार बन्न प्रेरणा मिल्ने उहाँले उल्लेख गर्नुभयो । बडादशैंले परिवार, आफन्त र समुदायबीचको सम्बन्ध प्रगाढ बनाउँदै आपसी सद्भाव र सहयोगको भावना विस्तार गरोस् भन्ने उहाँले शुभकामना व्यक्त गर्नुभयो ।
प्रतिक्रिया दिनुहोस्