राजावादीको आन्दोलनमा दुई जनाको मृत्यू

काठमाण्डौं – राजावादीले राजसंस्थाको माग राख्दै गरेको आन्दोलन हिंसात्मक भएकोले दुई जनाको मृत्यू भएको छ । आन्दोलनको भिडियो खिचिरहेका एभिन्यूजका २९ वर्षीय पत्रकार सुरेश रजक र प्रदर्शनकारी समूहका २३ वर्षीय सविन महर्जनको मृत्यू भएको प्रहरीले जनाएको छ ।

पत्रकार रजक तीनकुनेमा आन्दोलनको दृश्य खिचिरहेको बेला राजावादीहरुले गरेको आगजनीमा परी जलेर मृत्यू भएको थियो भने प्रदर्शनकारीलाई प्रहरीले चलाएको गोली लागेकोमा उपचारको क्रममा मृत्यू भएको बताइएको छ । पत्रकार हत्याको विरोध गर्दै नेपाल पत्रकार महासंघले देशभर विरोध कार्यक्रम तय गरेको छ ।

आन्दोलनमा नेपाल प्रहरीका ५३ जना, सशस्त्र प्रहरी बलका २२ र प्रदर्शनकारीतर्फ ३५ जना घाइते भएका छन् । यसैगरी नौ वटा सरकारी गाडी, छ वटा सरकारी वा निजी नखुलेका गाडीमा आगजनी भएको छ । विभिन्न १४ ठाउँमा आगजनी भएको, नौ वटा संस्थामा तोडफोड र एक ठाउँमा लुटपाट भएको जिल्ला प्रहरी परिसर काठमाण्डौंले जनाएको छ ।