दैलेख – महाबु गाउँपालिका अध्यक्षमा नेकपा एमालेका जंगबहादुर शाही विजयी हुनुभएको छ । तीन हजार एक सय २७ मत प्राप्त गरी उहाँ विजयी हुनुभएको मुख्य निर्वाचन अधिकृत जिल्ला न्यायाधीश कुलप्रसाद पाण्डेले जानकारी दिनुभयो ।
उहाँका निकटम् प्रतिद्वन्दी नेपाली काँग्रेसका झलकबहादुर भण्डारीले दुई हजार छ सय ७५ मत पाउनुभएको थियो । उहाँहरु बीच मतान्तर चार सय ५२ रहेको छ । नवनिर्वाचित अध्यक्ष शाही २०७४ को निर्वाचनमा एमालेको तर्फबाट अध्यक्ष जित्नुभएको थियो । उहाँ २०५४ को स्थानीय निर्वाचनमा काँशीकाँध गाविसको उपाध्यक्ष निर्वाचित हुनुभएको थियो ।
२०७८ मा एमालेबाट विभाजित भएको नेकपा एकीकृत समाजवादीमा लाग्नुभएको थियो । स्थानीय तह उपनिर्वाचनको उम्मेदवारी दिने समयमै कात्तिक अन्तिम साता नेकपा एमालेमा प्रवेश गरी यो पदमा उम्मेदवार बन्नुभएको थियो ।
सोमबार सकिएको मतगणनाको परिणाम अनुसार नेकपा माओवादी केन्द्रका जङ्गबहादुर बरालले आठ सय ४२ मत प्राप्त गरेर धरौटी जोगाउनुभएको छ ।
रास्वपाका प्रकाशकुमार बुढाले एक सय १२, नेमकिपाका दुर्गबहादुर मगरले ५३, राप्रपाका सुर्जे रावतले ३१ र नेकपा एकीकृत समाजवादीका जगत हमालले ४ मत पाउनुभएको छ । उहाँहरु चार जनाको धरौटी जफत भएको छ ।
प्रतिक्रिया दिनुहोस्