महाबु गापा अध्यक्षमा ७ जनाको उम्मेदवारी

दैलेख – मंसिर १६ गते हुने स्थानीय तहको उपनिर्वाचनका लागि दैलेखको महाबु गाउँपालिकाको अध्यक्ष पदमा सात र दुल्लू नगरपालिका १३ नं. वडाको वडाध्यक्ष पदका लागि छ जनाको उम्मेदवारी परेको छ । सबै जना दलीय उम्मेदवार भएको मुख्य निर्वाचन अधिकृत जिल्ला न्यायाधीश कुलप्रसाद पाण्डेले बताउनुभयो ।

महाबु गाउपालिकाको अध्यक्ष पदमा नेपाली काँग्रेसका झलकबहादुर भण्डारी, नेकपा एमालेका जङ्गबहादुर शाही, नेकपा माओवादी केन्द्रका जङ्गबहादुर बराल, रास्वपाका प्रकाशकुमार बुढा, नेकपा एसका जगतबहादुर हमाल, राप्रपाका सूर्जे रावल र नेमकिपाका दुर्गबहादुर मगरको उम्मेदवारी दर्ता भएको छ ।

दुल्लू नगरपालिका १३ नं. वडाको वडाध्यक्ष पदका लागि नेपाली काँग्रेसका रेशमबहादुर शाही, नेकपा एमालेका लालबहादुर शाही, नेकपा माओवादी केन्द्रका ढकेन्द्रबहादुर शाही, रास्वपाका रामबहादुर शाही, राप्रपाका रेशमकुमार मल्ल र नेमकिपाका पूर्णप्रसाद उपाध्यायको उम्मेदवारी दर्ता भएको छ ।

दर्ता भएको उम्मेदवारी विश्लेषण गर्दा मुख्य प्रत्यासी काँग्रेसका झलकबहादुर भण्डारीको र एमालेका वडा जङ्गबहादुर शाहीको वडाबाट अरु दुई–दुई जनाको उम्मेदवारी दर्ता भएको छ । भण्डारीको गृह वडा महाबु गापा–३ बाट रास्वपाका प्रकाशकुमार बुढा र राप्रपाका सूर्जे रावलको समेत उम्मेदवार परेकोले भेगीयताले पाउने मतमा थोरै असर पर्न सक्ने देखिन्छ ।

नेकपा एकीकृत समाजवादीका केन्द्रीय सदस्य पद त्यागेर एमालेबाट उम्मेदवार बन्नुभएका जङ्गबहादुर शाहीको गृह वडा महाबु गापा–५ बाट उहाँले चुनावकै मुखमा छोडेको दल नेकपा एकीकृत समाजवादीले जगतबहादुर हमाल र नेकपा माओवादी केन्द्रको राम्रो पकड रहेको त्यही भूगोलमा जङ्गबहादुर बरालको उम्मेदवारीले जङ्गबहादुर शाहीलाई सोचे जस्तो सजिलो छैन, भेगीय मतमा धेरै घाटा लाग्न सक्ने स्थानीयहरुको टिप्पणी छ ।

उम्मेदवारहरु मध्ये काँग्रेस र एमालेका उम्मेदवार आफूहरुको जित निश्चित भएको दाबी गर्दै खानेपानी, विद्युतीकरण, सडकहरुको सुधार गर्ने लगायतका विकास गर्ने बताएका छन् । माओवादी केन्द्रले संघीयता र समावेशीता आफूले ल्याएकोले सही मर्म अनुसार काम गर्ने भनेको छ । अरु दलहरुले सुशासन र जवाफदेहिताका लागि आफूहरुको उम्मेदवारी रहेको बताएका छन् ।

नेपाली काँग्रेसबाट निर्वाचित महाबु गाउँपालिका अध्यक्ष लछुमन गुरुङ्गको ७६ वर्षको उमेरमा २०७९ माघ २७ गते निधन भएको थियो । त्यसैगरी एमालेबाट निर्वाचित दुल्लू नगरपालिका–१३ वडाका वडाध्यक्ष बिर्खबहादुर शाहीको ६५ वर्षको उमेरमा २०८० माघ २२ गते निधन भएको थियो । निर्वाचन आयोगले तोकेको देशभरका ४४ स्थानमा स्थानीय तहको उपनिर्वाचनमा यहाँ पनि मंसिर १६ गते मतदान हुँदैछ ।