ज्येष्ठ सदस्य केसीले लिनुभयो शपथ

केसी २००४ असोज ११ गते नुवाकोटमा जन्मिनुभएको हो । पञ्चायतकालमै काँग्रेसको राजनीतिकमा लाग्नभएको कारण ६ वर्षभन्दा लामो समय जेल बस्नुभएको थियो ।त्रिभुवन विश्वविद्यालयबाट राजनीतिशास्त्रमा स्नातकोत्तर र नेपाल ल क्याम्पसबाट बिएल गर्नुभएका केसीले कानून व्यवसायी अधिवक्ता र त्रिभुवन विश्वविद्यालयमा राजनीतिशास्त्रका प्राध्यापक पनि गर्नुभएको थियो ।

२०३६ को जनमत संग्रहपछि २०३७ सालपछि केसी पञ्चायत प्रवेश गरेर राष्ट्रिय पञ्चायत सदस्यमा निर्वाचित हुनुभएको थियो । त्यसबेला स्वास्थ्य राज्यमन्त्री बन्नुभएको थियो । २०४६ सालको जनआन्दोलनले बहुदलीय व्यवस्था पुनस्र्थापना गरेपछि उहाँ फेरि नेपाली कांग्रेसको खुला राजनीतिमा जोडिनुभएको थियो ।

त्यसयता २०४८, २०५१, २०७० र २०७९ को चुनावबाट उनी प्रतिनिधिसभा सांसद बन्नुभएका केसी २०५२ मा स्वास्थ्य मन्त्री, २०५६ मा भौतिक पूर्वाधार मन्त्री, २०५६ मा शिक्षामन्त्री र २०६३ मा सहरी विकास मन्त्री बन्नुभएको थियो । उहाँ कांग्रेसकाे सहमहामन्त्री, प्रवक्ता, केन्द्रीय सदस्य र विदेश विभाग प्रमुखकाे जिम्मेवारी समेत सम्हाल्नु भएकाे थियाे।