दैलेख – दैलेखका ११ पालिकामा दुई चरणमा ९० वटै वडामा कोभिड विरुद्धको फाइजर खोप दिइने भएको छ । यूएसएआईडी/एफएचआई ३६० इपिक नेपाल परियोजनाको सहयोगमा स्वास्थ्य सेवा कार्यालयले दैलेखमा आयोजना गरेको कोभिड खोप समीक्षा तथा अभिमुखीकरण कार्यक्रममा यो जानकारी दिइएको हो ।
मन्त्रालयले पठाउने संख्या पनि सीमित भएको कारण ११ हजार व्यक्तिलाई पुग्ने गरी हरेक वडामा एक–एक वटा खोप केन्द्र कायम गरी कात्तिक ५ र ६ गते गुराँस, डुंगेश्वर, भगवतीमाई र ठाँटीकाँध गाउँपालिकासंगै चामुण्डाबिन्द्रासैनी, दुल्लू र आठबीस नगरपालिकामा खोप अभियान चलाइदै छ ।
त्यसैगरी कात्तिक ११ र १२ गते दैलेखको नौमूले, महाबु, भैरबी गाउँपालिका र नारायण नगरपालिकाका सबै वडामा कोभिड विरुद्धको फाइजर खोप दिइने कार्यक्रम तय गरिएको स्वास्थ्य सेवा कार्यालय दैलेखका खोप अधिकृत थीरप्रसाद रेग्मीले जानकारी दिनुभयो ।
कार्यक्रममा खोप अधिकृत रेग्मीले दैलेखमा खोपको प्रगति स्थिति र कोभिड खोप कार्ययोजना बारे सहजीकरण गर्नुभएको थियो । खोप कार्यक्रम र स्वास्थ्य सेवा कार्यक्रमहरुलाई प्रभावकारी बनाउन स्वास्थ्य सेवा कार्यालय दैलेखका निमित्त कार्यालय प्रमुख डा. मनोज बिश्वकर्माले स्वास्थ्यकर्मीहरुसंग आग्रह गर्नुभयो ।
एफएचआई ३६० इपिक नेपाल परियोजनाका कार्यक्रम व्यवस्थापक विशेषज्ञ प्रदीपकुमार श्रेष्ठले कोभिड १९ र यस्ता महामारीको बेला स्वास्थ्यकर्मीको तत्परता र दायित्व विषयमा अभिमुखीकरण गर्नुभएको थियो । कार्यक्रममा दैलेखका ११ वटै पालिकाका स्वास्थ्य शाखा प्रमुख र सहायक समेतको सहभागिता थियो ।
प्रतिक्रिया दिनुहोस्