चेल्सीलाई तीन अंक

काठमाण्डाैं – तनावपूर्ण खेलमा इन्जो फार्नान्डेजले दोस्रो हाफमा गरेको एक मात्र गोल निर्णायक बनेपछि इंग्लिस प्रिमियर लिगमा चेल्सीले टोटनहमविरुद्ध १–० को कठिन जित निकालेको छ ।

बिहीबार राति घरेलु मैदान स्ट्याम्फोर्ड ब्रिजमा चेल्सीका निम्ति अर्जेन्टिनी मिडफिल्डर फर्नान्डेजले ५०औँ मिनेटमा गोल गर्नुभएको थियो । उहाँले कोल पाल्मरको क्रसलाई हेडमार्फत पोस्टको दिशा दिनुभयो । यही गोल निर्णायक बन्दा चेल्सीले तीन अंक पक्का गरेको हो ।

खेलमा कुल १० पहेँलो कार्ड देखाइएको थियो । दुवै टिमका समान पाँच खेलाडीले पहेँलो कार्ड पाएका थिए । दुई गोललाई भिडियो असिस्टेन्ट रेफ्री (भार)ले अस्वीकृत गरेको थियो । खेलको ५६औँ मिनेटमा चेल्सीका मोइसेस काइसेडोले उत्कृष्ट भली गोल गर्नुभएको थियो । तर, भार जाँचपछि लेभी कोलविल अफसाइडमा देखिएकाले त्यो गोलले मान्यता पाएन ।

टोटनहमका वैकल्पिक खेलाडी पापे सारले ७१औँ मिनेटमा लामो दूरीबाट गोल गर्नुभयो । तर, उहाँले त्यो मुभभन्दा आगाडि नै काइसेडोलाई फउल गरेको देखिएपछि भाारले त्यसलाई मान्यता दिएन । जितसँगै ३० खेलबाट ५२ अंक जोडेको चेल्सी चौथो स्थानमा उक्लिएको छ । पराजित टोटनहम समान खेलबाट ३४ अंकका साथ १४औँ स्थानमा छ ।