चैत २६ गतेदेखि दैलेख महोत्सव हुँदै

दैलेख – स्थानीय कला र संस्कृतिको संरक्षण तथा पर्यटीय क्षेत्रको प्रचारप्रसार गर्न चैत २६ गतेदेखि दैलेख महोत्सव हुने भएको छ । चैत २७ गतेदेखि वैशाख ४ गतेसम्म स्थानीय कला सँस्कृति र राष्ट्रिय कलाकारहरुको प्रस्तूती रहने आयोजकले आइतबार दैलेख सदरमुकाममा आयोजना गरेको पत्रकार सम्मेलनमा जानकारी दिएको छ ।

महोत्वले सामाजिक उत्तरदायित्व अन्तरगत नारायण नगरपालिका-७ किमुगाउँमा संचालित वेद विद्याआश्रम र दुल्लू नगरपालिका-१० नाभिस्थानमा संचालित वेद विद्याआश्रममा एक वर्षभरी पुग्ने खाद्यान्न उपलव्ध गराउनेसंगै नारायण नगरपालिका६ भविष्य वनस्थित पार्कमा सार्वजनिक शौचालय निर्माण गरिने मूल समितिका संयोजक भूपेन्द्र शाहीले जानकारी दिनुभयो ।

‘दैलेख साँस्कृतिक तथा पर्यटन महोत्सव–२०८१’ नाम दिइएको महोत्सवमा स्टलमा राखिएका दैलेखका जिल्लाका स्थानीय तहमा उत्पादित कृषि वस्तुहरूको बजारिकरणसंगै स्थानीय कलासंस्कृति झल्कने लहरेपैसरी नाँच, ढाल तरवार नाँच, देउडा तथा रत्यौली नाँच, हुड्के नाँच, मयुर नााच, टप्पा नाँच, गर्रा नाँच प्रदर्शनी एवं प्रवर्द्धन गरिने संयोजक शाहीले वताउनुभयो ।

जिल्लाका साँस्कृतिक सम्पदा र परम्परागत जीवन शैलीलाई प्रतिनिधित्व गर्ने प्रविधि र संसाधनहरुको जगेर्ना गरिने तथा स्थानीय परम्परागत शिप, कला र संस्कृतिको संरक्षण र प्रवद्र्धन गरिने लक्ष्य लिइएको छ । विविधता झल्किने सांस्कृतिक झाँकी, संस्कृति र भेषभुषा झल्किने साँगितिक प्रस्तुती समेटिने दैलेख महोत्सवमा २५-३० लाख रुपिंयाँको कारोबार हुने अनुमान छ ।

रेडियो मातृभूभी एफएम ९६.५ मेगाहर्ज दैलेख र स्वाच्छ शहर निर्माण केन्द्र दैलेख मूल आयोजक रहेको महोत्सवमा नेपाल घरेलु तथा साना उद्योग महासंघ दैलेख र राष्ट्रिय लोक तथा दोहोरी गीत प्रतिष्ठान नेपाल दैलेख सहआयोजक रहेका छन् भने दैलेखको नारायण नगरपालिका संरक्षक तथा प्रवद्र्धक रहेको बताइएको छ । महोत्सवमा एक सय रुपियाँ प्रवेश शुल्क तोकिएको छ ।